 |
|
| माओवादीहरूले पत्रकार वीरेन्द्र साहको हत्या आफ्ना कार्यकर्ताबाट भएको बताएका थिए |
माओवादी कार्यकर्ताद्वारा भएको पत्रकार हत्याको विरोधमा पत्रकारहरुको छाता संगठन नेपाल पत्रकार महासंघले मंगलवार देशव्यापी विरोध कार्यक्रम गर्यो।
बाराका अपहरित पत्रकार वीरेन्द्र साहको हत्याको विरोधमा देशका विभिन्न जिल्लाहरु जस्तै महासंघको अगुवाइमा राजधानी काठमाण्डूमा पनि विरोध जुलुस र शोक सभाको आयोजना गरिएको थियो।
सभामा प्राध्यापक, वकील, शिक्षक, मानव अधिकारकर्मी लगायत विभिन्न समुदायका प्रतिनिधिहरुले हत्याको विरोध गरेका थिए।
चेतावनी
झन्डै महिनादिनदेखि साह जिउँदो भेटिने झिनो आशा बोकेका पत्रकारहरुले मंगलबार उनको तस्वीरमा अबीर र पुष्पगुच्छा चढाएर श्रद्धाञ्जली अर्पण गरेका थिए।
त्यस पछि आयोजित सभामा बोल्दै नेपाल पत्रकार महासंघका सभापति विष्णु निष्ठुरीले हत्याका अभियुक्तलाई प्रहरीसमक्ष बुझाउन, साहका सन्तानको शिक्षा एवं परिवारको भरणपोषण सुनिश्चित गर्न र माओवादी नेतृत्वलाई सार्वजनिक रुपमा माफी माग्न आग्रह गरे।
उनले चेतावनी दिँदै भने, "प्रेसप्रति माओवादीको दुर्व्यवहार, पशुवत व्यवहार नरोकिने हो भने पेशागत चरित्र विपरीत माओवादीसँग सम्बन्ध राख्ने वा नराख्ने निर्णय गर्न वाध्य हुने छौ।"
पत्रकारहरुको शोकमा सामेल भएका लेखक खगेन्द्र संग्रौलाले एकजना पत्रकार मारिंदा पत्रकार र लेखकका अंशअंश मारिएको बताए।
हत्याका अभियुक्तलाई गिरफ्तार नगरी लाचार बनेको भन्दै वक्ताहरुले सरकारप्रति तीव्र आक्रोश ब्यक्त गरेका थिए।
कान्तिपुर दैनिकका सम्पादक नारायण वाग्लेले भने, "अपराधिक समूह स्पाईडर ग्रुपको व्यक्ति समात्न नयाँ दिल्लीसम्म पुग्ने नेपाल सरकार साहको हत्यामा संलग्नलाई गिरफ्तार नगरी कुन नैतिकताको आधारमा सत्तामा छ?"
पत्रकार साहको हत्याको खबर सार्वजनिक भएपछि त्यसको राष्ट्रिय र अन्तर्राष्ट्रिय क्षेत्रबाट निन्दा भएको छ।
तर सरकारले हालसम्म कुनै प्रतिक्रिया जनाएको छैन।
पछिल्लो छ वर्षमा राज्य र माओवादी पक्षबाट २० जना पत्रकारको हत्या भइसकेको छ। | 
.png)
