कोरियाली चिकित्सकले यौनशोषण गरेको आरोप
सुरज कुँवर
ललितपुर, मंसिर २३ - 'श्रीमती बनाउँला भन्नुहुन्थ्यो,' नेपालमा कार्यरत एक कोरियाली चिकित्सकबाट यौनशोषण हुँदै आएको उल्लेख गर्दै २३ वषर्ीय पुनम -नाम परिवर्तन) ले भनिन्- 'अहिले त घरैबाट निस्कनुपर्यो । ज्यानको सुरक्षा पनि छैन ।'
एक दशकदेखि नेपालमा क्लिनिक, चर्च र बालगृह सञ्चालन गर्दै आएका स्वाङ क्वाम किमबाट यसरी आफू अन्यायमा परेको यसरी कान्तिपुरलाई सुनाइन् । आफ्नो सुरक्षा, क्ष्ातिपूर्ति र पीडकलाई कारबाही माग गर्दै उनी शुक्रबार ललितपुर प्रहरीमा पुगेकी छन् । किमले उनलाई गत वैशाखमा घरबाट निकालिदिएका थिए । घरनिकाला भएपछि माओवादीको शरणमा गए पनि 'जनअदालत' भंग भएकाले यसबारे सुनुवाइ भएन ।
किमले यौनशोषण सार्वजनिक गरे बालगृहमा रहेका आफ्ना छोरालाई निकालिदिने धम्कीसमेत दिएको उनले बताइन् । किमले पहिलो पटक बेहोस बनाई जबर्जस्ती गरेको उनको आरोप छ । 'रुघा लागेका बेला निको हुने औषधि खान दिन्छु, भनेर आफ्नो कोठामा बोलाए,' उनले भनिन्- 'झोल औषधि खान दिए, त्यसपछि बेहोस भएछु ।' बेहोस अवस्थामा अनुचित कार्य गरेको आफूले होस खुलेपछि मात्र थाहा पाएको उनले बताइन् ।
पुनमका अनुसार उनीमाथि जबर्जस्ती भएको दिन किमकी श्रीमती सहारा कोरियाबाट आएको टिमसँग भारत भ्रमणमा गएकी थिइन् । त्यसपछि किमले भान्सा, ग्यालरीलगायत एकान्तमा संवेदनशील अंग चलाउने, जबर्जस्ती गर्न खोज्ने, सुतेको कोठामा जबर्जस्ती पस्ने गरेको उनको आरोप छ । किमकी श्रीमती सहाराले भने पतिको त्यस्तो चरित्र नपाएको दाबी गरिन् ।
किमसँग भएको आफूले यौनशोषणबारे गरेको विवादको पुनमले अडियो रेकर्ड गरेकी छन् । रेकर्डमा उनले आफ्नो बदनाम हुने कुरा नगर्न धम्की दिएका छन् । त्रिभुवन विश्वविद्यालयको सिफारिसमा किम ६ वर्षदेखि अफिसियल भिसामा नेपाल बस्दै आएका हुन् ।
कोरियाको काङनाम विश्वविद्यालयले त्रिविसँग गरेको विशेष शिक्षा सम्झौताअनुसार उनी संयोजकका रूपमा कार्यरत छन् । 'सम्झौताअनुसार उनले काम गरेको पाइएको छैन,' विश्वविद्यालय शिक्षा संकायअन्तर्गतका एक प्राध्यापकले भने- 'विश्वविद्यालयले यसको अनुगमन गर्नुपर्छ ।'
किमले श्रीमतीको नाममा काठमाडौं मीनभवनमा नेपाल कोरिया डोनसाङ क्लिनिक नामको निजी क्लिनिक सञ्चालन गर्दै आएका छन् । यसबाहेेक उनले भैंसीपाटीमा एन्जेल्स बालगृह, कुपन्डोलमा मिस्पा चर्च, सानेपामा कोरियन चर्च, नवलपरासीमा शान्ति चर्च र विराटनगरमा पथरी चर्च पनि सञ्चालन गरेका छन् । राजधानीअघि उनी डोटीको दीपायलमा सुजन बोर्डिङ स्कुल चलाउँथे । किमका एक छोरा र एक छोरी अमेरिकी सरकारद्वारा सञ्चालित लिङकन स्कुलमा अध्यनरत छन् ।
पुनमको उजुरीपछि ललितपुर प्रहरीले आइतबार कारबाही प्रक्रिया सुरु गर्ने बताएको छ । किमले भने पुनमको आरोप झूटो भएको
बताए । उनले सम्पत्तिको लोभमा केही व्यक्तिले पुनमलाई उचालेको दाबी गरे । 'उनले मेरो घर छोडेको ७ महिना भयो । अहिले आएर किचलो गरेकी छन्,' उनले भने- 'मेरो सम्पत्ति देखेर यो आरोप लगाएको हो ।'
पुनमले भने छोरालाई निकालिदिने धम्की दिएको र कानुनी प्रक्रिया थाहा नपाएकाले घटना सार्वजनिक गर्न ढिला भएको बताइन् ।
पुनम २०६० भदौमा उनको भैंसीपाटीस्थित निवासमा कामदारका रूपमा आएकी थिइन् ।
Posted on: 2006-12-09 22:07:21
